雖然海鮮一年四季都有，但有啲準備過冬，油脂豐富嘅魚類可是只有秋天先有。其中唔可以唔講嘅就係個名中帶有個秋字嘅秋刀魚。每年秋天，係北海道嘅第一波秋刀魚上市時，都會引起市場嘅關注 。雖然成年都可以食到，但秋季嘅秋刀魚皮下充滿油脂，肥美可口嘅秋刀魚，食唔到會係人生一大損失。除此之外，秋天亦係吃蟹嘅好時節，三點蟹、花蟹、毛蟹、大閘蟹、紅蟳 ，每一樣都令人垂涎欲滴，公蟹肉質飽滿彈牙，母蟹則鮮甜細緻，裏面金黃嘅蟹膏不論係直接享用定係拿去做料理都非常美味。
真功夫
雖然小編採訪時未到真正秋收之時，但亦係魚類比較肥美嘅時期，所以有得食就趁早食。鮨㐂賣點唔係精緻嘅賣相，而係用料同處理食材嘅手法，當中唔少得江戶前壽司嘅身影。另外佢地調配有淺色同深色嘅赤醋飯，淺色飯味道較淡，適合白身魚，深色飯較濃味，醬油同鹽會相對落得比較多，適合魚油味較重嘅魚，絕對係對食物落足心思。
水雲醋物
水雲配上酸汁，爽脆又開胃。
白粟米帶子茶碗蒸
餐廳會配以時令食材不時更換茶碗蒸嘅配料，今次嘅係白粟米帶子，兩樣食材互補鮮甜，配搭新奇，咸咸甜甜十分過癮。
子持香魚
香魚之所以好吃，係肉質非常細緻為特點，魚身帶有一絲清香，香魚經過淹漬後，風味更濃郁。
九繪魚
有「夢幻魚」之稱嘅高級魚 — 九繪魚，亦即係石班，呢款係季節性既食材黎，夏天係無得食，味道淡雅，肉質幼嫩。
大蜆壽司
大蜆壽司係正宗江戶前壽司中不可或缺嘅一員，因為處理工序繁複，加上食材價格成本高，已經唔多壽司店願意供應，大蜆清甜鮮美，赤醋飯嘅微酸更令大蜆獨特風味更加立體。
北海道縞蝦
鮨㐂招牌之一，縞蝦係深海蝦，以昆布漬過，蝦肉較彈牙，面頭一層蝦子、蝦膏同蝦油，底下係九州生蛋汁，沾滿蛋汁一齊放入口，鮮香味濃，入口順滑。
深海池魚
深海池魚脂肪結實、肉質肥嫩，刺身質地纖細柔軟，口感順滑鮮甜口感油潤，相對比較濃味。
煙燻鰹魚
鰹魚油脂豐盛，不過風味細緻，煙燻過後，表皮呈現金黃色，灑上乾葱芝麻享用，滋味無窮。
海膽三食
三款海膽包括鹽水紫海膽、宮澤白海膽同宮城銀次郎白海膽。紫海膽味道較淡，有海鹽嘅鹹香感，質感最順滑；宮澤白海膽口感較濃郁，甘甜度中高，加上岩鹽，鮮甜味更突出；宮城銀次郎白海膽甜味最突出，加上
三文魚子一齊食，鮮甜味美。
慢煮蠔
鮮蠔經過慢煮後係上枱前再輕輕燒熱，完美掌握生熟程度，鮮甜得嚟完全無腥味，再伴上濃濃嘅蠔湯，加入少少花雕酒，鮮香味無窮。
筋子壽司
筋子亦係三文魚子，保留卵巢薄膜，連膜整串醃漬，經赤味增醃製後仍舊保留其淡淡嘅海洋咸香，入口後，魚油滲出點點甜香，口感豐富滿足。
櫻煮八爪
櫻煮八爪魚呢一個浪漫嘅名稱係源於八爪魚經過三日慢煮之後顏色呈粉紅色，經過慢煮後肉質顯得格外柔軟，配上柚子胡椒，協調感十足。
赤身壽司
相信大部分港人都喜歡食既吞拿魚，赤紅泛光，吞拿魚中脂肪較少既部位，口感較為結實，魚味非常濃郁，令人回味。
秋刀魚
秋刀魚兩食，一係秋刀魚刺身，完美感受到秋刀魚入秋時嘅滋味；二係將秋刀魚配上特製芝麻醬，更突顯了魚嘅味道，微微麻香，肥美嘅秋刀魚滋味更富層次。
鮑魚配鮑魚肝醬
彈牙軟嫩嘅鮑魚，配合鮮甜度十足的鮑魚肝醬，想難食都難，加上鮑魚肝醬來伴壽司飯，係邪惡嘅美味。
金鯛松茸清湯
飲一啖松茸茹湯，身體立刻暖和起來。松茸湯汁清澈，味道清雅，透出淡淡松茸嘅幽香，加上金目鯛魚肉嘅鮮甜，簡直相輔相成。
金目鯛壽司
粉中帶紅既金目鯛，肌理較為緊實，表皮經過輕嫩燒過，能夠迫出油脂，表面添加了些許醋味噌，酸中帶鹹既味道同金目鯛既鮮甜配合得正好 。
中拖羅壽司
中拖羅簡直入口即溶，魚肉軟嫩，脂香油潤，加上wasabi 嘅一點辣，同中拖羅嘅魚脂交疊，令中拖羅壽司味道更為豐富有層次。
大拖羅壽司
大拖羅取自藍鰭吞拿魚肥美之魚腩位置，係全條吞拿魚中最肥美嘅部份。 大拖羅佈滿精緻嘅魚油花紋，入口即化，油香四溢，完全唔膩，鮮甜無比。師傅更將根位完全清除，完美嘅口感，幸福感滿滿。
鮟鱇魚肝米餅
鮟鱇魚肝被稱為海中嘅鵝肝，係日本被視為美味佳餚。魚肝醬豐富、柔滑、絲滑嘅質地入口有濃濃嘅魚肝香味。米餅係用赤醋飯手工烘乾壓製，脆卜卜嘅米餅同綿密軟滑嘅鮟鱇魚肝形成有趣嘅組合。
赤鯥壽司
赤鯥被譽為白身魚嘅絕對頂級魚，因它含有最豐富嘅油脂、魚身好滑好鮮甜，口感帶一點爽脆，魚油香濃，魚皮火灸過後，魚油嘅獨特香氣就更加明顯。
車海老壽司
車海老即係花竹蝦，鮮橙黃色嘅車海老，肉質鮮甜爽脆並有股甘甜味。亦用上江湖前壽司嘅做法，連頭帶殼燙煮，保留鮮味，加上微酸嘅赤醋飯，更突顯車海老嘅甘與甜。
赤魚湯
赤面豉湯顏色偏紅，魚湯極濃郁，味道透出淡淡魚香味，原來係以魚頭、蝦殼等熬煮過，湯中亦有豆腐、秋葵等物，係出色嘅湯物。
煎茶雪糕夾餅
自家製雪糕茶味濃郁，加上夾餅薄脆，口感豐富又滿足。
鮨㐂
地址：銅鑼灣渣甸街66號Aura on Pennington 18樓
電話：34262777
