南瀛水產位於尖沙咀商廈全層，由地鐵站步行2分鐘即到達，交通非常方便。餐廳環境闊落舒適，裝潢以木系為主調，用木製餐牌、紙遮、日本清酒、日式掛布等裝飾，仲有一個由日本清酒打造成嘅打卡牆，視覺上已經好似置身於日本嘅居酒屋，十分有心思。南瀛水產提供日本地道磯燒、刺身及壽司等，新鮮時令食材每日由日本新鮮運送抵港，而每一枱都有一個磯燒爐，會有專人幫客人磯燒水產，磯燒調味至最鮮味嘅熟度，客人只需要打卡同坐定定等食，非常貼心！

今次嘅體驗，記者會形容好似去咗一趟日本之旅，餐廳與食物主題互相呼應，南瀛水產用感官和味蕾引領食客回到磯燒發源地——日本，懷舊和風氣氛濃厚，裝飾用心別具特色，食物款式豐富，海鮮非常新鮮，成功營造地道日本居酒屋嘅飲食環境，當晚都見到好多食客摸着杯底傾偈，氣氛熱鬧滿瀉！呢個週末，不妨嚟南瀛水產小酌一杯，把酒言歡一個晚上！

螢光魷魚 HKD 58

螢光魷魚口感爽脆，鹹香之中充滿鮮甜魚香味。當初日本人發明呢個做法喺為咗保鮮，日本人出海釣魷魚時經常會隨身攜帶醃漬用嘅醬料，釣到魷魚後馬上放入醃漬，稱為「沖漬」。魷魚醃漬後依然保持刺身嘅口感，經過一段時間發酵，風味更加昇華。肥美鮮味，外層帶爽脆感，味道帶點咸香，喺絕佳嘅佐酒小食。

味醂魚乾 HKD 88

味醂魚乾燒至外皮乾身微焦，再剪成一條一條，脆得嚟又有咬口，拈上沙律醬更惹味，再配埋啤酒，居酒屋風味十足！

鱈魚乾 HKD 78

鱈魚乾烤至微微金黃，上碟時仲有餘溫，口感好鬆脆，有鱈魚既鮮甜味，點埋蛋黃醬就更加好食，好適合做暢飲傾計時嘅零食。

香蒜牛舌 HKD 98

厚切嘅大大塊牛舌好軟腍，加上黑椒同香脆蒜粒增添風味，提升口感層次，擠上新鮮檸檬汁更能帶出牛肉嘅鮮味。原來呢道香蒜牛舌，師傅需要炮製兩日，第一日將牛脷調味醃製，第二日慢火炆煮，先可以令牛舌外脆內軟，難怪咁有驚喜，值得推介。

活貝盛合 HKD 428

活貝盛盒喺二人份量，有鮑魚、扇貝、生蠔、白蜆各2隻。店員喺每枱客人面前烹調，時間拿捏得宜，調味以簡單為主，保留原汁原味，亦唔洗擔心自己燒得唔好而浪費食材，服務一流！

活生生嘅原隻連殼鮑魚， 非常肥美新鮮，上碟時仲生猛地郁動，燒熟後的鮑魚剪至細件，口感爽口彈牙唔會韌，加入少量七味粉調味，更惹味同時品嚐到鮑魚嘅鮮香。

連殼嘅扇貝雪白圓潤，燒熟後剪到一口大小，鮮甜彈牙，品嚐純純的原汁原味，記者表示，最後嘅湯汁先喺精華，千祈唔好放過，超級鮮甜！生蠔同白蜆肉質肥美挺身，咬落軟滑多汁，乾淨冇沙，陣陣海水鹹味，鮮味十足！

蟹味噌甲羅燒 HKD 68

南瀛水產嘅招牌菜，賣相令人垂涎，濃郁蟹膏放入日本松葉蟹殼，配合蟹味噌、蟹肉、蟹籽、生鵪鶉蛋同埋蔥花，店員放喺烤爐上一邊攪一邊燒，灑上日本清酒 ，蟹膏味香濃郁，鹹中帶鮮，蟹籽喺口中爆破，口感豐富！色香味俱全，啖啖幸福滋味，必點推介！

雲丹蟹肉卷 HKD 228

所謂嘅雲丹亦即是海膽，海膽嘅日文叫法喺Uni，譯成漢字就喺雲丹，雲丹蟹肉卷包裹住滿滿嘅蟹肉，上面再加上份量十足嘅海膽，配搭青瓜清新味蕾，口感相當豐富，一啖收獲滿滿嘅幸福感，每一啖都相當鮮味，超滿足！

海鮮天婦羅 HKD 228

海鮮天婦羅除咗經典嘅炸蝦外，仲有帶子、魚柳、貝類等海鮮，都算抵食，用心擺盤原碟呈上，外表金黃香脆。味道方面，天婦羅入口香脆，重點喺一啲都唔會覺得油膩，海鮮新鮮爽甜，鹹鮮味香，配搭天婦羅醬汁，非常和味。

南瀛沙冰雪糕 HKD 88

食咗咁多熱辣辣嘅美食，當然要食番個南瀛沙冰雪糕透心涼一下啦！豆腐雪糕放滿青蘋果味，外邊用日本青蘋果包圍，無論視覺上定味道上都十分滿足！

日本雪糕(芝麻/豆腐/綠茶) HKD 48

三款雪糕都唔會太甜，十分清涼解膩，記者最愛豆腐味雪糕，豆味非常香濃！

南瀛水產

地址：尖沙咀金馬倫道5號太興廣場5樓