全店以摩洛哥風格作設計，濃濃嘅異國風情。而餐廳內更有唔少打卡位，人造沙灘、許願池、露天座位等。雖然未能去旅行，不過去打卡，止下癮都唔錯，女士嚟打卡就記得著靚啲！一入餐廳，即刻見到多個打卡位，如以藍白色為主調嘅希臘風許願池，可以坐係池邊享受美食；又如以真沙打造的室內人造沙灘，一旁放滿仙人掌、沙灘座椅等，配合埋投影嘅海浪同海浪聲，猶如去咗渡假一樣。色彩豔麗嘅織布，保留著古老樸質嘅風格，加一啲充滿熱帶風情嘅圖案，幻彩嘅馬賽克磁磚拼湊整體空間，充滿異國風情，若想擺脫城市鬱悶嘅束縛，嚟到Subtle island，絕對令你就算唔食嘢都唔捨得離開。
軟殻蟹咸蛋黃忌廉汁意粉
環境啱晒打卡之餘，食物都好啱打卡，其中軟殻蟹咸蛋黃忌廉汁意粉就係最多人點嘅其中一樣。 一上到嚟就有驚喜，大大隻既軟殼蟹已經霸氣外露，加上佈滿鹹蛋黃碎嘅忌廉汁意粉表面，就好似螃蟹喺海灘上面，同四周嘅環境相映成趣，即時有種去咗海島國家享受美食嘅感覺。軟殻蟹炸到好穌脆，中間重保留到好多蟹肉同蟹膏，有外脆內軟既口感，唔會炸到縮咗水，得翻層殼。 鹹蛋黃忌廉汁可以食得出同普通忌廉汁嘅唔同，鹹蛋黃味好香濃，口感都食到鹹蛋黃沙沙嘅感覺，忌廉汁則香滑非常，矛盾嘅感覺卻起到神奇嘅化學作用，十分有趣。每條意粉沾滿鹹蛋黃碎，充滿著鹹香味，但神奇嘅係鹹蛋黃同忌廉汁都咁膩，但融合起嚟只有美味，鹹蛋黃嘅鹹香同忌廉汁嘅香甜滋味令人忍唔住一啖接一啖。
牛油果雞肉墨西捲
女士如果覺得軟殻蟹咸蛋黃忌廉汁意粉太過重口味，牛油果雞肉墨西捲就低卡高營養，而且夠晒異國風情，同環境夾到絕，擺盤精美，一片綠油油，食落無壓力，亦啱晒打卡。嚟到嘅墨西捲係熱辣辣，外脆內軟，重要好多料，滿滿牛油果溶、有牛油果粒、嫰滑雞肉同生菜，健康得嚟又好好食，同埋墨西捲表面吱咗沙律醬，令到味道變化層次更多更濕潤。當食到滿口都係牛油果醬嘅味道時，旁邊嘅新鮮沙律菜可以令到口腔煥然一新，再食多幾口都唔會厭，待別係炎炎夏日，就更加覺得清新開胃。
水牛城雞翼
炸過嘅雞翼塗滿水牛城醬，又酸又辣，味道非常濃郁強烈，惹味嘅香辣醬汁，好食都停唔到口。
吞拿魚腩他他伴魚子醬
賣相相當別緻，啲花同菜配色好有心機，擺盤就好似藝術品咁。塊葉係芝士味嘅，通透又美觀，吞拿魚腩好新鮮，整體味道又鮮又甜，加上魚子醬咸香，層次十分豐富。
香煎帶子伴芝士脆片
又一道擺到似藝術品嘅菜式，真係啱晒打卡。帶子表面微微煎至金黃色，肉厚鮮甜，淋滑非常，同咸香得嚟又脆卜卜嘅芝士脆片形成有報嘅對比，十分過癮。
炸羊助骨
炸羊肋骨外面做到好酥脆嘅感覺，羊臊味唔算太重，肉質淋滑，容易咬開，炸得唔會太乾。自家製嘅芥末醬配埋黎食都幾待別，正好中和羊臊味同令鮮味更特出。
Latte
拉花夠靚，飲起來雖然奶味較重，但唔會有很重奶泡感，係個咁舒服嘅環境，完全有種旅遊嘅感覺。
Margarita
用龍舌蘭酒配製嘅雞尾酒，以龍舌蘭酒、檸檬汁同君度橙皮酒等混合而成，杯口上粘有一層細鹽，一齊飲時風味更獨特。酸溜溜嘅柑橘味，係炎熱嘅夏季作為餐前酒就啱晒。
Blue Hawaii
以藍柑橘香甜酒作為基調，加入蘭姆酒同菠蘿汁，口感香甜爽口，顏色藍藍綠綠， 十分清涼，充滿夏日風情。
Earl Grey Lava Cake
心太軟大家一定有食過，但伯爵茶味嘅就真係非常少見。心太軟火候控制得好好，有流心效果， 帶有淡淡嘅伯爵茶香，唔會太甜。
Subtle Island
地址：旺角西洋菜南街51號友誠商業中心4樓
電話：5348 1417
