講到高級日本料理，大家都會聯想到近年香港開得成行成市的鮨店。日本飲食文化多姿多采，除壽司刺身之外，又要食得精緻，咁就要試試割烹料理。大廚按時令發辦，在開放式廚房，通過煮、烤、炸、蒸、生（即刺身）演繹季節嘅味道。客人坐係吧枱位前，一邊睇住大廚製作菜式，一邊相互交流，同時滿足視覺同味覺享受。

壽司割烹新時代

割烹發音為「かっぽうkappou」，最早出現在江戶時代後期，「割烹」代表嘅係「高級料理」，與東京嘅鄉土料理「江戶料理」以示區別。到咗現代，割烹嘅最大特點係以吧台同餐桌為中心嘅開放式廚房，師傅配合客人嘅需求喜好量身訂做菜餚，而客人同時一邊欣賞師傅做菜嘅身姿一邊享受料理。然而壽司與割烹為兩種不同料理模式，壽司是透過醋飯與鮨種結合而成，大多使用海鮮類嘅生冷食材。而割烹則係將食材透過刀工等處理後再烹調嘅熱食，唔單只有煮物、烤物、炸物等各式日本料理型態，亦會有刺身等冷食，製作後以一道道供應方式給饕客。而壽司割烹料理係現今流行嘅日本料理，係將「壽司」與「割烹」結合，形成「壽司割烹」嘅店家型態。

敢於創新

八瀧嘅Tony師傅喺「壽司割烹」基礎上，更增添上Fine Dining元素，從入座嘅第一印象，到服務生應對，到器皿姿態，到菜色呈現，到食材品質，到風味組合層次，到整體菜單概念，全都做恰到好處，無論係氣氛、環境、服務都會專注細節。係原有日本料理處理手法上，加入西餐Fine Dining處理食材工藝，令到高級日本料理更添層次。對於食客而言，可以感受不一樣嘅Omakase之餘，更可以體驗昇華後高級日本料理旅程，絕對係一次美妙嘅享受。

壽司割烹Omakase

先付兩品

用簡單嘅木盒盛載兩道簡單嘅料理，師傅話兩道料理都係比較清淡，主要係為咗打開客人嘅味蕾，當中亦細心介紹當中海膽豆腐同赤水母刺身嘅特點，又建議進食嘅次序。

海膽豆腐

香滑嘅豆腐滲出海膽嘅甘香，每一啖都係淡淡嘅海膽香味 ，口感清爽細緻軟滑，上面加上新鮮嘅蟹肉，咸咸甜甜嘅鮮味更突顯清香嘅豆腐。

赤水母刺身

赤水母刺身用酸汁醃製，有點麻油、醬油味道，食落酸酸甜甜，口感滑捋捋，特别爽脆，好開胃。

前菜三品

用一個長方玻璃盒呈現，隱約見到盒中五顏六色嘅食材，打開後如同打開一個寶箱，入面放上精緻嘅食龍珠果、磯煮鮑魚同瑩光魷魚，加上食用花嘅襯托，就好似珠寶一樣映入眼簾。

龍珠果

配種龍珠果，又叫鬼燈籠，清甜多汁味道有啲似杧果同百香果，有獨特嘅香味，而且味道變化複雜。

磯煮鮑魚

磯煮鮑魚用醬汁及昆布慢火去炆，時間火候剛好，肉質保持鮮嫩彈牙，濃郁嘅湯汁裹住鮑魚，十分香甜！

瑩光魷魚

用咗醬油醃漬嘅沖漬料理，魷魚咬落去煙煙韌韌又滑嘟嘟嘅口感，擁有佢自己獨特風味，味道鹹鹹地，既鮮味又唔腥，重要爆漿，感覺非常特別。

刺身五點

五點刺身包括陸前真蠔、北海道牡丹蝦、蛇腹拖羅、愛知縣象拔蚌同鮟鱇魚肝，每道菜式都用上精緻不一嘅器皿，每道菜式都好似一件獨立嘅藝術品。當然話就話刺身，但師傅就用咗割烹加西餐嘅處理手法，令到令道菜式都有唔同嘅層次同變化，完全打破已往對刺身嘅觀念。

陸前真蠔

陸前真蠔新鮮就一定架啦，肥嘟嘟咁好飽滿，口感十分爽脆，海水味重。最特別係師傅用咗自家製蘋果啫喱代替平時嘅選擇啫喱，蘋果嘅甜味比較溫和，唔會有千秋咁刺激，令到3號提先得來又唔會搶走生蠔嘅鮮味，加埋紫蘇花一齊食用嘅時候，層次香味更加豐富。

北海道牡丹蝦

北海道牡丹蝦擺盤設計精緻，牡丹蝦上有一層蝦油同蝦膏，增加牡丹蝦嘅香味，一口吃下去蝦肉蝦膏蝦油的味道慢慢散發，好有層次。而重點係用蝦頭蝦殼所精煉而成嘅蝦油，簡直係蝦嘅精華所在，濃郁嘅蝦味同牡丹蝦本身嘅鮮甜互相輝映，衝擊力爆燈。

蛇腹拖羅

蛇腹拖羅係吞拿魚腩中最肥美嘅部份，雪花紋最多，入口即溶，經過熟成令魚味變濃。師傅將拖羅輕輕炙燒，令油脂味更香濃，同時亦燒斷拖羅嘅根，真係咬都唔洗咬。杯底嘅洋蔥酸汁又係另一驚喜，洋蔥嘅甜味同酸汁嘅酸味剛好中和蛇腹拖羅嘅肥膩感，但最神奇嘅係洋蔥嘅辛辣味，令到吞拿魚嘅鮮味上升咗幾個層次，簡直神來之筆。

愛知縣象拔蚌

象拔蚌新鮮爽口，有海水味同濃濃貝類嘅味道，比一般象拔蚌天鮮甜。師傅配上粟米凍湯，凍湯打得好輕盈，非常可口，利用粟米自然嘅清甜味引起象拔蚌嘅鮮甜，令到象拔蚌嘅鮮出晒嚟。

鮟鱇魚肝

鮟鱇魚肝上面有燈色既細點，證明佢係新鮮食材，口感非常之細滑，入口即溶，每一啖都有好香嘅魚肝味，完全唔覺得腥！廚師推介要加少少Wasabi一齊食，試完絕對有驚喜，Wasabi啱啱好中和返鮟鱇魚肝嘅濃味，食落口唔會太漏，辛香感為魚肝香味更添層次，溫和中有點野性！

季節料理

蟹肉伴蟹湯凍

松葉蟹肉質軟滑、味道極度鮮美。用來做湯凍的是師傅自家熬的蟹湯，加埋金薄點綴，靚到似和菓子，好似好清，但蟹味十足。鮮甜嘅蟹肉加上蟹味濃郁嘅蟹湯凍已經好似將成隻蟹一啖融係口入面，再加上梅酒啫喱嘅酸甜同酒香，唔單止令蟹味立體，亦令味道更添變化。

海膽拿破崙

用天婦羅紫菜夾住吞拿魚蓉，再係面頭鋪上滿滿北海道赤海膽，唔講味道，眼球嘅衝擊感已經爆燈，打卡一流。吞拿魚蓉肉質肥美、幼細香滑，北海道赤海膽入口味道濃郁、極高甘甜度，海膽拿破崙集香脆、軟綿於一身，一啖咬落去就好似食咗夾餅咁有唔同口感，幸福感滿瀉。

天婦羅拼盤

包括天婦羅銀雪魚、南瓜、冬菇同舞蓉。天婦羅銀雪魚呈金黃色, 酥脆嘅天婦羅表皮藏住細膩而綿密口感嘅銀雪魚，魚油香甜而不膩；天婦羅南瓜,，外層鬆脆嘅天婦羅表皮更能凸顯出南瓜嘅蜜甜美味；天婦羅冬菇咬起來重係十分多汁，亦有濃郁嘅冬菇香味；天婦羅舞蓉，食落去依然係熱度十足，鮮甜嘅菇汁係口中爆發出嚟。

白魚湯

白魚湯係連埋茶壺一齊上。未飲嘅時候有保溫嘅作用。魚湯係奶白色，味道香濃，仲非常足料，每一啖湯都魚肉同海帶喺入邊，鮮味十足。甜品

甜品

柚子雪芭夾餅配白桃蛋卷

柚子雪芭酸酸甜甜好清新，加埋夾餅外脆內軟，完全可以將成晚食過嘅唔同味道清除。白桃蛋捲桃味濃郁，十分香甜，甜蜜嘅滋味，可以為整頓晚餐畫上完美嘅句號。

成晚新鮮又高品質嘅食材，Tony師傅以細膩嘅烹飪技藝將之提升到接近完美嘅狀態。食材原本嘅味道被彰顯出來，被深深淺淺嘅鮮味烘托著，味道層層疊疊，唔係為咗巧立明目，而係將美味隱身喺細節之中，隱藏驚喜。

八瀧

地址：尖沙咀白蘭軒道2號富峰行3樓

電話：27778808