我之所以會睇呢套電影係比佢嘅世界觀同埋故事簡介吸引咗，呢個故事係講述女主角喺死咗之後面對着陪伴咗自己67年嘅第二任丈夫以及喺死後等待咗佢67年嘅第一任丈夫之間抉擇嘅故事，故事嘅世界觀將人死後嘅世界描述為人可以自行選擇前往哪一個永生國度，電影中有沙灘世界，無納粹世界，種族歧視世界，甚至宣傳語為你已經咗了唔會再被癌症困擾嘅煙民世界，人們選擇一個自己鍾意嘅世界之後就可以喺嗰度渡過自己嘅永生，但係一旦選擇咗就冇得改變，故事嘅主人翁作出咗自己嘅抉擇，但係故事外面嘅我反而會有少少貪心咁諗，淨係可以選擇一個世界，日復一日咁樣做同一樣嘅嘢，就算好鍾意都會悶，當然呢一啲嘅世界只不過係故事嘅背景板，真正嘅主線係主角究竟係應該選擇喺陽間同佢共同渡過咗67年生兒育女嘅平凡丈夫，定係當初新婚冇幾耐就去咗參戰戰死沙場嘅第一任完美丈夫？因為冇真正相處過，而可以令人有更加多嘅想像空間美化，早死嘅第一任丈夫不單高大有型，對女主角呵護備至，甚至係死咗之後唔願意前往永生國，而係留低打工等待女主角67年，種種因素疊加起上嚟都令到呢個人物更加完美，但另一邊廂係真係喺陽間相處咗67年共同渡過風雨，但亦有個爭吵嘅丈夫，女主角就糾結咗非常耐，最後都作出咗佢嘅選擇，呢套電影係由A24出品，A24以發行風格獨特、低成本且題材新穎的獨立電影聞名，而呢套電影亦都令我睇到佢延續咗呢一種風格，故事背景新穎，而切換永生國度嘅日同夜係好明顯可以睇得出係用幕布嚟切換，佢用咗一種成本唔高嘅方但係結合成個世界觀，出嚟嘅畫面係非常之有趣。