上期小編就試咗「米線關注組」所推介嘅米線，結果係有驚喜嘅。今次就試吓「串燒關注組」所推介嘅串燒店－鳥魂。其實香港有特色嘅小店有好多，但係有出色美食卻並未廣為人知嘅小店比比皆是，最近在太子開業嘅「鳥魂」，前身係「拾伍·貳拾手作串燒」，而「鳥魂」嘅出現正正係老闆兼大廚牛丸想為顧客帶來更好嘅環境同食物體驗所進化而成，將小店定位高級日式串店路線。

鳥魂的裝修以木色同黑色為主調，設有串燒吧枱，空間寬敞舒適，走日系簡約型格路線，即使小店亦營造出高級感。顧名思義，小店嘅意思就係不可以同時招待好多客人，但同時體現出日本飲食文化嗰種「慢工出細貨」同「即叫即做」，都只係為咗保持食物質素。鳥魂主打「燒鳥」，「燒鳥」喺日本非常盛行，燒鳥嘅日文係「 焼き鳥」，意思係燒烤，而鳥就係雞，雞肉串燒並唔單單係大蔥配雞髀肉，由裡到外，心肝皮腎都可以化成「 焼き鳥」。大廚牛丸以鹽燒為主嘅處理手法，喺食材加入適量鹽或特製胡椒鹽作調味，可突出食材本身嘅味道，令到食串燒時唔洗再加醬汁都充分展現食材的味道層次。

海陸空定番一人前

熟悉小編嘅都知望住個餐牌選擇困難症又會發作，樣樣都非常吸引，真係無從入手，見到個日式串燒Omakase雙眼就發晒光，唔洗諗正呀。不過老闆娘就介紹新推出嘅定番一人前套餐，有齊海陸空食材，啱晒貪心嘅小編。套餐包括廚師沙律、肝醬燒慢煮南非鮑魚、野菜味噌醬燒海虎蝦、新鮮白鱔、日本地雞手羽先、鹽蔥牛舌厚燒、鹽蔥西班牙豚五花、月見雞肉軟骨棒、青意瓜、角瓜同手作雪糕。

廚師沙律以蕃茄為主角，清新酸甜，開胃非常；肝醬燒慢煮南非鮑魚，鮑魚大大隻，鮮味十足，軟淋嫩滑，配上特製飽魚肝醬，食到原隻鮑魚最原始最鮮嘅味道；野菜味噌醬燒海虎蝦，海虎蝦好巨型，蝦頭膏多味濃，蝦身肉多肥美，肉質結實、爽口彈牙，加上香甜惹味嘅秘製野菜味噌醬，色香味更加突出；新鮮白鱔，外皮焦脆，肉質厚實，油脂經過燒烤後香而不膩，鮮味無窮；日本地雞手羽先，皮脆肉嫩，肉質有咬口，胡椒鹽惹味得嚟又更突出雞肉嘅鮮甜；鹽蔥牛舌厚燒，牛舌厚身好有口感，軟淋中帶點彈牙，充滿牛舌獨特香表氣，表面鋪滿葱，葱香加上牛舌香，形成啖啖好滋味；鹽蔥西班牙豚五花，油脂甘香油潤，肉質鬆化，蔥香令豚五花嘅味道層次更豐富；月見雞肉軟骨棒，雞肉同雞軟骨嘅比例恰到好處，好有口感，焦脆的雞肉雞軟骨串混合金黃色的蛋黃，香濃馥郁，無論視覺上定味國上到十分滿足；青意瓜其實係意大利青瓜，口感爽脆，有啲似翠玉瓜，但味道更加清甜；國瓜係較嫩嘅絲瓜，清甜多汁之餘又唔會太過軟爛，口感好特別；手作雪糕有三種味道，分別係芝麻、士多啤梨同綠茶，芝麻雪糕味道濃郁，而且十分綿滑；士多啤梨雪糕用上熊本士多啤梨新鮮製成， 十分鮮甜；綠茶雪糕，香甜中帶有回甘，十分驚喜。

三大必試系列

無骨系列

雞翼三角、無骨雞翼尖和無骨手羽

三串串燒採用雞翼唔同嘅部位而做出質感同味道獨特嘅無骨系列，啱晒唔鍾意骨頭嘅食肉獸。鳥魂獨有嘅無骨雞翼尖同雞翼三角，靠仔細嘅處理及改刀而成，所以數量唔多。雞翼選用日本地雞交趾雞，特別有咬口。三串都做到外脆內軟，雞翼三角肉質爽滑，雞味鮮甜；無骨翼尖口感煙韌，油脂香味重，但完全無肥膩感；無骨手羽啖啖肉，嫩滑得嚟咬口，唔講以為食緊雞髀肉。

雞皮系列

燒雞皮、雞皮天使蝦、雞皮蘆筍同雞皮黑松露墨魚滑

極邪惡燒雞皮，雞皮係有厚度，烤過後香脆又有彈性嘅口感，而且雞皮獨有嘅香氣越食越出，簡直令人停唔到口。 雞皮天使蝦，咬開焦脆雞皮後係天使蝦嘅爽彈，口感好過癮，天使蝦蝦頭都燒到脆卜卜，好香口，蝦身蝦味濃郁，同雞皮拼湊出一種特殊嘅香甜味道。

雞皮蘆筍，外脆內爽，估唔到雞皮同蔬菜都可以咁夾，蘆筍嘅鮮甜配上雞油嘅香味，嗰種矛盾喺口腔不斷衝擊，完全難以用文字去形容！ 雞皮黑松露墨魚滑，只係聽過名就流晒口水，外脆內軟，墨魚爽滑彈牙，鮮甜十足，重滲出陣陣黑松露香氣，層次豐富，一個字-絕！

稀有部位系列

雞掌心、雞腳根、雞心管、砂肝銀皮（左至右）

雞掌心，每隻雞只有兩粒雞掌心，故此需要兩隻雞方可串成一串，骨膠原相當豐富，食落好多軟骨同腳筋，質感超彈牙煙韌，韌性十足，加上鹽燒好香口。

雞腳根，靠嘅係牛丸師傅出色嘅刀工，取下完整帶皮雞腳踝軟骨，完美火候讓表層嘅雞皮酥脆，入面嗰層嘅軟骨充滿嚼勁，越嚼越香。

雞心管係雞心與雞肝之間嘅血管，用上大概四隻雞先可以串成一串，燒到好濕潤唔乾身，口感彈牙，帶有脂肪，雞味濃郁。

砂肝銀皮係雞胃部嘅肉，一般嚟講好多人都係扔掉嘅，好硬，但經過處理後就會變得好脆，質韌脆嫩，口感非常奇妙。

小編強烈推廌

鮪魚臉頰

吞拿魚嘅面珠㻻，諗都諗到滑溜無比，含豐富膠質，同時富油香，肉質軟嫰又厚身，經過炙燒後油香逼晒出嚟，吞拿魚嘅精華彷彿全部都喺口入邊，幸福感滿滿。

A5和牛牛小排

A5和牛入口即溶，一啲根鍵都無，牛嘅油脂經過炭燒後，香味更濃郁，令人忍唔住一啖接一啖，最神奇嘅係食完成串都唔會膩。

半熟雞肝

雞肝以半熟呈現，外面鬆軟，內裹流心，嫰滑口感帶有濃濃幸福感，雞肝獨特嘅香濃口感充滿口腔，回味無窮，齒頰留香。

美酒配美食

食串燒又點可以少得酒，為咗讓客人有更好嘅飲食體驗，老闆娘Kimmy更考取唎酒師資格，為客人介紹合適嘅美酒。

「鬼火」

「鬼火」在日本傳說中，多見於盛夏之夜，尤如這款稍稍辛口及清爽嘅口感，十分適合於熱天品嚐，慢慢從味蕾滲出的餘韻，像鬼魂般在舌尖上裶徊。日本酒度＋6，表示味道偏為辛口，同串燒、鐵板燒和油分高嘅食材十分相配。

「夜游」

「夜游」取自中國詩人李白詩中一節嘅「古人秉燭夜遊」，解作拿著蠟燭，夜裡遊玩。願望品嚐者能持著及時行樂、珍惜光陰嘅人生態度。味道溫和清香，入口軟滑帶少許辛勁，能感受到米甘之香。

「珍珠」

被挑選為「G8高峰會」宴會酒之一，精選自日本各式各樣高質素嘅食材及美酒，以招待來自八個國家嘅首相及首相夫人。味道充滿蘋果般的吟釀香氣，口感清爽，帶著柔和的辛口味道。

「鳥魂」

酒名正與店名呼應，副題寫上武陵桃源，是來自陶淵明的《桃花源記》。 由於使用木曾地下低溫軟水長期熟成，使酒體清純無比。山田錦嘅清香甘甜配合濃郁嘅水果味，具有不膩口嘅旨味。口感醇厚，酒香優雅迷人，令人回味無窮。

鳥魂

地址：太子汝州街37-41號廣勝大廈地下B號舖

電話：63755807