鐵板燒 X Fine Dining - 尖沙咀N.28 TEPPANYAKI-SHINING

餐廳裝修走型格路線，以黑色作主調，燈光聚焦一入門口就見到長型吧枱，客人可以一邊用餐，一邊欣賞廚師炮製鐵板燒。鐵板燒菜式帶點西日fusion，係原有日本鐵板燒處理手法上，加入西餐Fine Dining處理食材工藝，甚至乎分子料理嘅處理手法，令到高級日本料理更添層次，加上精美嘅擺盤，想唔打卡都難。

美味之盛宴

今次推介嘅係人氣日本 A5 和牛海鮮二人套餐，匯集世界各地矜貴食材，日本 A5 和牛、法國魚子醬、澳洲黑邊鮑魚、西班牙紅蝦等應有盡有，配合師傅巧手技藝，打造色香味多重享受。喺開始之前，師傅更將主要材料擺放喺食客面前，望住油花均勻嘅米沢和牛、比砂煲咁大嘅拳頭更加大嘅生猛澳洲黑邊鮑魚、半臂咁大嘅西班牙紅蝦，食慾已經大振，滿滿期待嚟緊嘅盛宴。

先付

三款漬物包括冰頭漬、牛蒡漬同蘿蔔漬。冰頭漬係三文魚頭前端嘅軟骨，醋漬與硬硬軟軟嘅口感，異常過癮。牛蒡味道甘甜，加上濃濃嘅醬油味，咸咸甜甜，入口清爽。蘿蔔漬輕微鹹味中帶有少許甜味，同樣爽脆。漬物味道有齊甜、酸、咸，可以刺激食慾味蕾，令到味蕾可以準備好嚟緊嘅珍饈百味。

蔥吞拿魚腩他他

係吞拿魚腩他他上面加上三文魚子同用分子料理製作嘅豉油波波，再以食用花同山葵作點綴，伴以精緻嘅器皿，形成一道美妙嘅藝術品術品。吞拿魚腩蓉肉質充滿油香，散發細緻嘅魚香同獨特味道，葱絲嘅香氣中和吞拿魚腩嘅油膩感覺，兩者配合得天衣無縫，加上新鮮三文魚籽同用分子豉油拌勻嚟食，一啖有齊三重口感，吞拿魚鮮味更爆發性提升。

鐵板鵝肝蒸蛋

鵝肝係鐵板上香煎，香氣撲鼻，表皮煎得香脆，然後入口即溶，一口滿滿嘅油香，幸福感滿滿。蒸蛋選用日本雞蛋，蛋黃色澤光亮，味道甘甜，香濃嘅蛋味配上帶子青海苔醬汁嘅海洋咸香，已經極具滋味，再加香醇甘美嘅法國魚子醬在鐵板上蒸焗，海鮮味道更爆發性提升。最後加入新鮮紅菜頭苗，味道清甜可口，三種滋味為味蕾帶來全新衝擊，香醇甘美嘅口感令人沉醉其中。

香脆金鯛立鱗燒配龍蝦南瓜忌廉汁

選用日本嘅金鯛，師傅特別用滾油淋於產自日本青森縣嘅金鯛，使魚鱗片豎起，如花般綻放，酥香清脆，魚鱗嘅酥香脆，並同魚肉嘅軟嫩形成強烈對比，加上形色吸睛搶眼，未食視覺已經得到滿足。金鯛嘅魚肉細滑又新鮮，魚鱗經油炸後十分香脆，魚皮有韌勁，一啖有齊三種口感，配上鮮甜濃郁龍蝦南瓜忌廉汁作提味，每一口都有齊濃郁嘅南瓜甜味同鮮甜嘅金鯛魚肉，層次非常豐富。底部仲有清新嘅蕃茄青瓜碎，可以減低油膩感，成就一道精緻佳餚。

西班牙紅蝦伴法國魚子醬

師傅會係鐵板上將大大隻嘅西班牙紅蝦處理，剝殼同挑蝦腸一氣呵成，再將蝦頭嘅蝦膏取出備用，最後輕輕煎煮蝦身，最後調味，過程十分療癒。西班牙紅蝦上枱時伴上法國魚子醬再配搭特製蟹膏醬汁同自家製蟹膏豆腐加上分子柚子泡沫，師傅為咗保留紅蝦嘅最佳質感，將紅蝦保持五成熟，令紅蝦保留爽嫩口感，魚子醬咸香更突出紅蝦鮮甜，再加上蟹膏醬汁，簡直鮮味無論。再一口蟹膏豆腐，令口中鮮味可以保留之餘又帶點清新，味道層次層出不窮。

澳洲黑邊鮑魚

廚師一早把黑邊鮑魚放在鐵板嘅邊緣，由第一道菜式開始就見到黑邊鮑魚生猛蠕動，到料理時先將鮑魚肉取出，再切薄片煎炒調味，最後伴上特製肝貝汁一同上台。由煎炒時已經香氣四溢，前段入口重牛油香，中段就有胡椒香散出，後段鮮香味蜂擁而來，層次豐富。黑邊鮑魚想像唔到咁嫩滑彈牙，加上肝貝醬大大提鮮，即使唔配搭其他食材，亦可獨領風騷。

法國鮮黑松露野菌忌廉湯

野菌忌廉湯已經預備好，但在鐵板上加熱時，菇菌香氣令人精神為之一振，上台前加入即磨嘅白菌片同黑松露，令香氣更加迷人。野菌忌廉湯綿滑濃厚，加上原片黑松露，口腔充滿松露香氣，而黑松露嘅味道喺口中不停蔓延。

沙律

以柚子醋作為醬汁，伴以新鮮蔬菜並加入蘆薈粒，清爽得嚟口感亦十分豐富，正好清除口中複雜嘅味道。

日本A5和牛厚燒

米澤和牛嚟自日本山形縣，係三大和牛之一，同松阪牛、神戶牛齊名。佢油花分布平均，肉質細緻，肉味特別香甜，產量唔多，所以非常珍貴。以厚燒方法處理，令和牛釋出油脂同鎖緊肉汁，再加上即場煙燻，令肉香更迷人，層次更豐富，美味充滿整個口腔。師傅係處理和牛之前會先問客人喜好嘅生熟程度，今次師傅就將火候控制係三成，令到和牛十分粉嫩，入口即溶。師傅特登唔用鹽作調味，而係配上特製嘅麵豉醬或鹽漬昆布提味，令肉味更濃郁，再加上炸蒜片進食，口感更係一流，更為香口。放係和牛之下嘅蘆筍更係畫龍點睛之處，吸收咗和牛嘅肉汁，完美調和和牛嘅油膩感，同時提升肉味，令肉香在口中不停徘徊。

西班牙紅蝦膏燴意大利飯

之前備用嘅西班牙紅蝦膏就係留嚟製作依個意大利燴飯，除咗紅蝦膏重加入秘製龍蝦湯，令係鐵板燒煮時已經鮮香撲鼻，上枱時再加上大大個紅蝦頭同海膽，未食都覺得吸引。意大利飯每粒米都被鮮濃嘅蝦膏包圍著，為黏韌嘅意大利飯賦予香濃嘅味道同豐富嘅層次感，真是一口一鮮味，令人食唔停口。當配上海膽一齊食，清甜同濃香兩極感覺喺口中交纏，美味感覺難以形容。