牛扒之藝術 - 北角Steak Art-SHINING

高級扒房之選

去高級西餐廳點牛扒，食到嘅幾乎都係乾式熟成牛肉（Dry-aged beef），基本上已成為高質牛扒嘅主流。點解經過乾式熟成的牛肉特別好吃呢？其實並唔係只有牛肉有熟成（Aging）這道工序，其他肉類都有，原因係動物剛被宰殺嘅幾個小時內雖然肉質係鬆弛嘅，但係過後又會變得僵硬，依個時候並唔適合食用。而熟成可以利用牛肉本身帶有嘅酵素破壞肌肉結締組織，令肉質更加軟嫩；同時蒸發肌肉組織中嘅多餘水份，令到牛肉嘅風味更飽滿同集中。通過熟成，可以令剛屠宰後僵硬緊繃嘅肉從內部發生變化，以提升肉質嘅嫩度（Tenderness）、風味（flavor）及含汁性（Juicy）。至於多數高級西餐嘅廚師之所以選擇乾式熟成牛肉，則係因為西方飲食推崇呈現食材嘅原味，而乾式熟成會讓牛肉外表脫水，牛肉本身嘅香味也會更加濃郁，且在料理時更容易上色並達到外酥裡嫩嘅口感。

追求美味嘅極致

「Steak Art」走時尚fusion風格扒房路線，感覺輕鬆悠閒，餐廳一邊設開揚嘅落地玻璃，日間寫意、入夜浪漫，各有唔同氛圍。雖然氛圍輕鬆，但 Steak Art 對極致美味嘅追求有種執著，引入德國乾式熟成櫃，自家做乾式熟成。乾熟成櫃保持攝氏1至2度，避免溫度低過令水份結冰而影響牛肉質地，另外，櫃內設有紫外線燈幫空氣消毒，濕度控制60至90%之間，令牛肉保持最佳狀態。熟成後嘅牛扒，重量會減少約3成，可烹煮嘅部分只剩7成左右。老闆更自己研究唔同品種唔同部位嘅牛肉熟成時間，為求將最優質嘅美味帶俾食客。

高性價比之晚餐

雖然聽落好似好高級，但估唔到晚餐套餐並唔貴，三百零蚊就可以試到乾式熟成牛扒，絕對超值。套餐包括沙律、餐湯、主菜同咖啡奶茶，即使係套餐，質素一啲都唔馬虎。沙律係鮮芒果大蝦沙律，新鮮爽脆嘅沙律菜配上鮮甜嘅芒果同爽口大蝦，加上少少胡麻醬作調味，十分清新溫和。是日餐湯係蘑菇忌廉濃湯，濃郁香滑，食得到真材實料蘑菇蓉，夾雜蘑菇獨特嘅香氣，令人忍唔住一啖接一啖。最吸引嘅亮點當然係用21日乾式熟成紐西蘭一級肉眼配季節性蔬菜，熟成牛肉嘅蛋白酶會令肌肉纖維結構變鬆軟，令到肉質變得更鮮嫩多汁，油香會更集中。熟成後牛肉會散發出獨特嘅「堅果香」同「奶油香」，再加上炭火嘅焦香，形成獨具野性嘅氣味。肉眼油花多而且分佈均勻，啱啱五成熟，一刀切開後，顏色粉嫩粉嫩，入口又香又滑，牛味慢慢滲出，越來越濃，層次豐富，加上特製醬汁就更添滋味。配菜炸薯仔亦非常出色，外脆內軟，調味恰到好處。而蔬菜嘅清新鮮甜也好好中和牛扒嘅濃烈味道，令成道主菜變得十分平衡。

意料之外嘅美味：烤西班牙紅蝦茫果莎莎配龍蝦汁扁意粉

除咗牛扒出色外，估唔到意粉都有意外之喜，本來以為牛扒係主打就夠晒出色，但估唔到重有意外之喜，就係烤西班牙紅蝦茫果莎莎配龍蝦汁扁意粉，絕對唔可以唔試。西班牙紅蝦被譽為全世界最貴同最好吃嘅蝦，十分巨形，最吸引人嘅，就係鮮甜同濃濃蝦味，同其他蝦類唔同嘅爽彈，紅蝦嘅口感比較軟嫩，配上酸酸甜甜嘅莎莎醬，再加上時令嘅芒果，更增添豐富嘅口感同果香，搭配紅蝦時更清爽味美。意粉更加係神來之筆，秘密係佢嘅醬汁，醬汁其實就係熬足三日嘅龍蝦湯，濃濃嘅龍蝦滋味完全融入意粉之中。無論紅蝦定意粉，每一啖都蝦味十足，口中鮮味不斷徘徊，滿足感十足。

法式龍蝦湯配阿根廷紅蝦刺身

法式龍蝦湯，傳統法式方法熬製嘅龍蝦湯將龍蝦頭以白蘭地慢火炒香，逼出龍蝦嘅鮮甜味道，再加上大量蔬菜及香料熬足三日，濃郁甜美，每一啖都是龍蝦精華。配上原隻阿根廷紅蝦刺身及脆多士，紅蝦蝦味強烈、肉質軟滑，將蝦肉做成刺身、蝦頭炸脆，加上一粒粒嘅係分子豉油，配合阿根廷紅蝦一齊食，口感豐富有層次。（晚餐餐湯亦可以加錢升級）

香煎鵝肝配燒蘋果伴柚子梅酒啫喱

鵝肝有入口即溶嘅幼滑質感，令人難以忘懷，不過一次過吃晒成塊鵝肝，會有啲膩，加上微微酸酸甜甜嘅蘋果，正好中和了鵝肝嘅膩。柚子梅酒啫喱，可以放喺鵝肝上面等佢溶化，又可以一啖鵝肝一啖啫喱，風味同層次就更豐富。

北海道刺身帶子他他
芒果、蕃茄、藜麥、牛油果

賣相夠哂精緻，成個小蛋糕咁。北海道刺身級帶子，帶子味濃郁，爽口又彈牙，鮮甜嘅芒果同牛油果，為味蕾混合出新鮮感。爽脆嘅蕃茄同藜麥，令他他口感更加多變，加埋脆卜卜嘅墨西哥西哥栗米片一齊食時，味道同口感絕對可以成為一個令人回味無窮嘅旅程。

美國頂級荷斯坦365日穀飼牛 - 封門柳

美國荷斯坦牛，穀飼牛油脂嘅含量比較多，油花會更均勻飽滿，封門牛柳肉嘅纖維極細緻嫩滑，由於其所在位置係牛嘅橫膈膜，會有少少內臟嘅味道，簡單以炭燒方法烹調，保持肉汁及鮮嫩。經過炭燒嘅封門柳烤得外層略帶焦脆，中間嫣紅，而且一上枱便飄嚟幽幽炭香。封門柳有嚼勁，咬落煙韌有致，肉味鮮濃，加上微微炭香，香氣更豐富，啱晒無肉不歡嘅牛魔王。