隱秘之料理 - 神木日本料理-SHINING

神木日本料理主打爐端燒方式製作和牛烤肉，另有不同嘅日式料理。裝修以簡約木色為主調，配搭搞鬼嘅日式配飾同打卡位，氣氛啱晒一邊燒肉，一邊傾偈。餐廳嘅每個座位更設有獨立抽氣系統，唔怕被油煙熏到隻眼。穿過店面呈現闊落的露台別有洞天，掛滿漫天小燈泡入夜更顯寫意。另外，神木日本料理亦係寵物友善餐廳，若帶埋毛孩，則可以到戶外座位用餐，亦唔會影響到室內其他客人，而狗狗亦會有寵物餐牌，唔駛再做陪食專員。

絕對要一試嘅薩摩和牛

神木日本料理近期主打鹿兒島薩摩牛，薩摩和牛揀用純鹿兒島黑毛和牛種嘅母牛，相比其他和牛肉色較為鮮紅，肉質更加嫩滑，肉內含相當豐富的油脂且熔點低，油脂中還帶有一股非常明顯的奶油香，食落極度夢幻！薩摩牛獨一無二嘅口感，一啖擺入口，和牛油香如湧泉滲出，入口近乎即溶，身為和牛迷嘅小編當然唔會錯過。

神木三重奏
A5鹿兒島薩摩和牛拼盤套餐（二人份量）

套餐除咗可以食到和牛外，重有海鮮拼盤、刺身拼盤同主食，真係夠晒豐富。

和牛拼盤有羽下、肉眼上蓋、肩胛肉眼花芯、厚切牛舌、美國頂級Prime西冷，份量都一啲都唔嘢少。羽下肉質有彈性、口感軟嫩適中，而細密嘅油脂分布則令羽下肉充滿油脂香氣。肉眼上蓋嘅大理石油脂花紋分布均勻，油香滿溢，肉質滑嫩，入口即溶，而且肉汁爆棚。牛肩胛肉芯既有細緻油花，又有濃厚肉味，肉質也非常軟滑，各方面都極度出色。牛舌經炭火煎烤後，肉汁仍然豐富，加上表面有炙燒過，口感爽滑，香氣誘人，非常惹味。西冷牛扒完美脂肪比例夠晒吸睛，比起肉眼睇脂肪食落會較少，唔會太肥膩，幼嫩中帶少許咬口，牛味相當濃郁。和牛全部沒有調味，配搭燒肉汁或鹽醬就已經好出色，加埋白飯一齊放入口中，幸福感爆燈。

海鮮拼盤

有扇貝、鮑魚、魷魚同甲羅燒，海鮮都非常新鮮，燒後更係傳出鮮甜嘅味道。扇貝大大粒，十分飽滿，燒嘅時候加少少鹽就已經鮮味十足。鮑魚輕輕𠝹過幾刀，燒嘅時候更易熟，想唔鮮甜彈牙都難。魷魚一路笑嘅時候一路傳來撲鼻嘅香氣，較薄嘅位置比較爽脆，較後嘅位置比較煙靭，兩種唔同嘅質感非常過癮。重有小編最愛嘅甲羅燒，蟹蓋裡填滿了蟹膏，燒時香氣不斷湧出、蟹膏鮮味濃郁，加埋鵪鶉蛋更加香滑，用匙羹一大口吃食，滿滿嘅鮮甜味嘴內散發，令人慾擺不能，再配上主食嘅白飯，簡直停唔到口。

刺身拼盤

包括三文魚、白身魚、甜蝦、北寄貝、帆立貝5款，雖然比較簡單，但擺盤吸引，每一款賣相都十分新鮮精美，就算用嚟打卡都唔失禮。三文魚脂肪比例剛好，軟淋滑溜，魚油香味濃郁。白身魚應該係鯛魚，肉質帶有粉紅色，甘爽鮮甜，清淡優雅中帶著細膩嘅油脂，肉質彈性十足。甜蝦算比較大隻，肉質細綿，味道鮮甜，完全無雪味。北寄貝貝味甘甜、肉質肥厚，口感爽脆。帆立貝肥大肉厚，本身就鮮甜十足，加上檸檬嘅微酸，甜度更加突出。

灸燒A5和牛海膽魚子丼

丼飯一出場氣勢迫人，完全見唔到飯，只有滿滿嘅和牛，上面重有海膽小塔，再加上三文魚子同金箔，賣相已經令人食指大動。A5和牛嘅份量有好多，厚度適中，選用嘅位置正好肥而不膩，肉味十分濃郁，入口滿口油脂，滑嫩得嚟，又有彈性，每一口都有好重既牛香同牛味，令人食唔停口。海膽係用咗馬糞海膽，食落味道甘甜，一啲苦味腥味都無，口感嫩滑，一瞬滿足感滿滿。三文魚子都粒粒飽滿，顏色鮮艷，咬落脆卜卜，又咸又甜，仲有少少海水味，鮮味十足。A5和牛、海膽、三文魚子加上白飯一齊轟入口中，牛肉與海鮮滋味共冶一爐，神奇地可以互相配合，轉化出唔同層次，感覺非常夢幻，絕對係食肉獸之選。

木壽司定食配烏冬

擺盤真係好靚，好多花花裝飾，木製嘅層架好似展示緊藝術品，而藝術品正正係六貫美輪美奐嘅壽司。壽司包括吞拿魚、赤蝦、白身魚、燒左口魚群邊同赤貝，另外重有吞拿魚蓉魚子手卷。吞拿魚係拖羅部位，油脂夠晒豐富，幾乎無筋，口感順滑，入口即溶。赤蝦口感細緻，而且肉質彈牙，蝦味十足。白身魚同樣係鯛魚，清爽鮮甜，係醋飯襯托之下更突顯魚味。將左口魚群邊表面燒至半熟，再令左口嘅魚油迫出來，入口細滑同爽口，油香撲鼻。赤貝口感外層爽脆，內裡貝肉卻又軟又嫩，口感特別，海水以及鮮甜味濃郁，帶有獨特的濃厚海洋氣息。吞拿魚蓉魚子手卷，吞拿魚蓉就有淡淡嘅魚味同淡淡嘅甜味，口感細滑，三文魚子就有濃郁嘅醬油味帶有甜香，兩者咸咸甜甜產生神奇嘅化學作用係味蕾上交纏。另外定食亦包括茶碗蒸、麵豉湯、前菜同烏冬，茶碗蒸同麵豉湯就比較普通，前菜係漬牛舌，卻很有驚喜，經過醃漬嘅牛舌爽口彈牙之餘帶點微辣，加上酸甜嘅黃蘿蔔同清爽嘅青瓜，十分開胃。而作為主食嘅烏冬也相當出色，煙韌且富有彈性嘅湯烏冬吸飽清甜嘅豬骨湯底，咬勁十足，加上少少昆布，濃郁嘅湯頭口感卻清爽。