告別一天嘅辛勞高質居酒屋

平民化鐵板燒

火舞町門面係簡約嘅和式風格，以紙製燈籠，配搭黑木系色調嘅門面，雖然唔係華麗奪目，但就有種隱式美食店嘅感覺。店內裝修亦貫徹依種簡約格調，用竹簾同黑木組合成嘅卡位，好有復古嘅感覺。火舞町主打多款平民價錢嘅鐵板燒料理，係日本，鐵板燒係日本料理中較為昂貴嘅一種料理方式，鐵板燒較常以高級、新鮮嘅食材，由富經驗嘅廚師係食客面前即時烹製。除了味覺滿足外，欣賞廚師嘅烹製食物過程亦係一種特別嘅體驗。火舞町以日本關西地區嘅御好燒、玉子燒等平民美食作主打，令到附近嘅街坊同打工仔可以平價地享受鐵板燒。

高質澳洲龍蝦

雖然主打平民價錢嘅鐵板燒料理，但高級食材都唔會缺少，加上香港人愛打卡，招牌澳洲龍蝦尾一定要試一試。日本料理之中，鐵板燒最色香味俱全。坐係鐵板吧枱前，睇著廚師舞動鐵鏟，烹調美食嘅功架、食材隨著熱力傳來嘅香氣，令人食指大動！龍蝦尾拆殼起肉後於鐵板上香煎，龍蝦肉厚肥美，以簡單嘅鹽同胡椒調味，更能帶出龍蝦嘅鮮味，師傅更細心問小編嘅口味調節調味分量。望著龍蝦肉係鐵板上煎烤，香味撲鼻而嚟，加上滋滋嘅聲音，同慢慢變成金黃嘅龍蝦肉，口水已經流晒出嚟。龍蝦尾啖啖肉，肉質鮮味彈牙，外面焦脆，內裏鬆軟。澳洲龍蝦本身味濃而且味道鮮甜，鐵板燒過後嘅香氣，更能令龍蝦嘅鮮味突出，香味濃郁。

令人懷念嘅味道：大阪燒

大阪燒是日本關西的一種民間美食，外觀似Pizza嘅一種煎餅。早期大阪燒嘅配料主要是以蔬菜為主，後來加入了肉類、海鮮、炒麵、雞蛋等，口感亦變得豐富，係日本人都難以抵擋嘅美味。喺香港可以食到大阪燒嘅餐廳仍唔算多，加上香港人愛遊大阪，變相令人回味嘅美食絕對無唔食嘅理由。以麵糊、椰菜混合製成嘅餅底，口感飽滿鬆軟又帶點爽脆，火候與麵糊比例都控制得好好，做到入口即化，唔會太過厚實。加上日本豚肉同蛋一起煎令味覺更加有層次，塗上香甜醬汁更增添食慾，灑上木魚絲，口感層次更加豐富。