隱世平民 Find Dining - 太和L'AMOUR-SHINING

未入餐廳已經見到驚喜，餐廳係門外看非常有氣派，㩒餐廳嘅門鐘等開門，店員一打開霧化咗嘅玻璃扇門嗰陣，原本睇唔到入面嘅扇門即刻變得透光同睇到入面嘅環境，而當門再關上嘅時候就再次睇唔到出面嘅環境，幾高私癮度，相當特別又神秘。餐廳環境同氣氛都十分浪漫，面積唔算好大，巨型嘅水晶吊燈為餐廳增添高級感。

Set Lunch

蝶豆花木魚清湯鯛魚刺身

附上檸檬汁，把檸檬汁倒在蝶豆花湯上，可自由加減份量，蝶豆花湯漸漸變色，由紫色變成粉紅色，好靚既畫面，就好似一個魔術咁！鯛魚刺身嘅口感好清爽，酸酸甜甜嘅蝶豆花木魚清湯味道令到魚味更加突出，配塔有花心思。

是日餐湯：薰衣草南瓜湯

湯嘅味道非常獨特，質地柔軟順滑，飲落很溫暖愉悅，薰衣草嘅香氣同南瓜嘅甜味相互融合，令人難以忘懷。再加上香味濃郁嘅蒜蓉包，鹹鹹甜甜十分過癮。

海膽扁意粉

簡單又精美嘅伴碟，配上大量海膽同金箔嘅意粉小塔，賣相已經相當出色。意粉煮得剛好，搭配上鮮甜嘅海膽同香濃嘅忌廉醬汁，口感非常豐富，讓人回味無窮。

美女與野獸

上菜時先用玻璃罐罩着，內裏充滿煙霧，打開玻璃罩，就有煙霧輕輕飄敬，之後見到一朵玫塊花配合碟上金色花，非常有心思嘅一道甜品。玫瑰花用蓮蓉製成，唔會太甜，賞心悅目。

5 Course French Set Dinner

巴馬火腿果仁沙律

將巴馬火腿摺疊成玫瑰花形狀，火腿都散發出濃郁嘅咸香，肉質鮮嫩。果仁嘅爽脆配合火腿嘅柔嫩形成了完美嘅對比。沙律菜則為整道菜帶來了平衡同口感上嘅層次，當然唔少得加咗意大利黑醋去稍作調味，無論望落定食落都好豐富。

頂級牛肝野菌忌廉濃湯

誘人既野菌香氣，牛肝菌香味好濃郁，質地非常濃稠飽滿，每飲一啖，滿口都係野菌，又爽又滑。野菌嘅鮮美同忌廉嘅順滑完美結合，係一道口感豐富、風味獨特嘅湯品。

自家製藍花蟹餅

香脆表皮底下係一絲絲既手拆蟹肉，份量十足，藍花蟹肉質鮮嫩，帶有微妙嘅甜味。餅嘅外層金黃酥脆，內部則係鬆軟細緻，食完口中留有陣陣蟹味。

慢煮西班牙黑毛豬鞍焦糖蘋果

講到賣相真喺冇得彈，將西班牙黑毛豬鞍慢煮煎香，香味已經令人垂涎欲滴。肉質粉嫩唔會好嚡，豐富嘅肉汁鎖緊喺豬鞍肉之中，每一刀切落去或者咬落口都有濃郁黑毛豬香味嘅肉汁淺出，更有陣陣嘅橡果香氣，加埋蘋果蓉一齊食，肉味更加濃郁。另外伴菜有薯蓉、紫薯蓉、南瓜蓉同埋切咗片嘅焦糖蘋果，配埋豬鞍食去油解膩一流，食多多都唔會滯，旁邊帶酒香嘅焦糖蘋果真係好開胃，同埋有嶄新嘅味道！

比利時朱古力心太軟

用頂級朱古力製成，外層嘅酥脆口感，內裡流心質地，極為柔軟，如絲般滑順，整個口腔都充滿濃郁嘅巧克力香，入口真切感受到可可豆的香氣同甘甜。再加用酸酸甜甜嘅鮮果同雪芭沾上朱古力一齊食，層次風味更巨變化。

9 Course French Set Dinner

泡沫法國生蠔三文魚子

泡沫充滿檸檬香味，配合金箔三文魚子，賣相吸引。法國生蠔爽滑淡身，蠔嘅新鮮味道係泡沫同魚子襯托下變得突出，充滿驚喜。

法國傳統有機雜菜沙律

一上枱靚到嘩一聲，好似一個迷你花海，望真啲除咗食用花重有水果同有機雜菜。新鮮有機沙律菜、紫洋蔥、三色椒拌以黑醋，清新健康又醒胃，檻欖油香嘅藜麥，細細粒口感特別，完全沉沒係田園氣息之中。

法國特級鵝肝蛋撻

蛋撻酥脆鬆化且充滿蛋香，蛋心好滑溜，配上焦糖邊及鵝肝進食，蛋撻嘅甜中和咗鵝肝既油份，食完都唔會覺得好膩，鹹甜相間，層次超級豐富，作為前菜無得彈。

活澳洲龍蝦湯

以傳統法式方法熬製嘅龍蝦湯非常鮮甜，而且入邊仲會有帶子肉，濃郁嘅龍蝦湯十分平衡，飲落順滑舒服，真係令人感到幸福！

特式立鱗魚

鯛魚立鱗燒嘅做法加上三文魚子同魚子醬伴碟，未食視覺已經得到滿足。魚鱗嘅香脆，同魚肉嘅軟嫩形成強烈對比，加上魚子嘅脆卜卜，口感豐富。魚肉只用鹽嚟調味，再由魚子同魚子醬襯托，鯛魚肉鮮味得更加立體。

法國鵝肝日本A5和牛肉眼

傳統法式鵝肝牛柳，法國菜中經典嘅菜式，鵝肝嘅油脂經過煎香後油香滿溢，配搭廚師準確處理嘅五成熟牛肉眼，入口肉味配搭鵝肝味道係口腔爆發，滿足感爆燈。鵝肝嘅油脂同牛肉眼真係好夾，鵝肝外層煎得焦脆，一食落去有入口即溶嘅感覺，而牛肉眼質亦好鲜嫩多汁，油脂感滿滿，配埋鵝肝，簡直口感一流。伴碟都好靚好花心思，擺盤相當漂亮，除咗三色蔬菜蓉，重有小蘋果同露筍，味道好清新，配合鵝肝同牛肉眼，味覺同視覺都滋味無窮。