李婉君（Wendy）
講一下自己的背景？
其實我又好細個開始就好鍾意表演，應該係話好有表演慾。細個嘅時候都玩好多嘢，例如拉丁舞、芭蕾舞、體操等等仲參加好多興趣班，例如跆拳道、柔道之類。中學時期我係學校Dance Club嘅主席、Drama Club 嘅導演仲有喺校隊A Cappella嘅一員。
加入Spiral的機緣和感想，在加入時有沒有特別有趣或難忘的事情發生？
我本身都冇諗過可以成為Sprial嘅一員，所以可以加入呢個大家庭好開心，我算係最早入嚟的一個，對於之後會加入嘅成員好期待，會想像佢哋係一個點樣嘅人。通常團體係需要一段時間去磨合相處，我都冇諗過我哋四個會咁一拍即合。我諗共通點就係我哋四個都好嘈好鍾意講嘢、好有分享慾。喺呢幾個月入邊我最難忘嘅就係香港水浸嗰一日，因為我哋嗰陣時準備緊即將推出嘅歌，但係撞正惡劣天氣，所以我哋四個女仔就被迫要留喺公司過夜，再加上我嗰日皮膚敏感發作，同埋有啲唔舒服所以我記得特別清楚，但係因為嗰晚我哋唱咗通宵嘅歌又有大家陪住喺身邊，就覺得呢一晚好美妙同難得。
拍第一輯MV的拍後感，用新科技拍出來的效果覺得怎樣？
其實當時入到拍攝場地，看到新科技就已經好激動，我覺得特別正嘅一個位，係我哋拍攝嘅同事可以直接望到我哋出嚟嘅畫面。而且大家見過1秒轉場未，我就見過啦！透過X R拍攝真係方便同快捷好多，幫我哋慳咗唔少嘅時間。當影片出嚟嘅時候都可以睇得出好幾種唔同嘅感覺，有夢幻嘅、有壯觀嘅、仲有暗黑等等，成品相當地滿意。
Spiral是一隊和Virtual世界結合的女團，大家如何看這個虛擬世界，和想像一下未來的音樂世界？
我覺得未來嘅音樂世界就係可以將現實嘅你拉入一個虛擬嘅世界，去聽音樂嘅途中唔單止做到環迴立體聲嘅感覺，可能仲會令你分唔清楚呢度係虛擬定係現實。仲可能你認識嘅人聲音出到嚟原來同你認知上可能有出入，可以有好幾種唔同嘅聲，就好似加咗好多Filter咁樣。
每個人的新年新願望，希望在演藝界走得多遠？
我嘅新年願望就係希望Spiral 順順利利、大家健康同埋希望有多啲人可以認識我哋，聽我哋嘅歌，鍾意以及支持我哋，令我哋嘅演藝事業蒸蒸日上。到時候我哋就可以帶到更多嘅作品開演唱會，回饋返比鍾意我哋嘅粉絲”螺絲粉”。
你現在修讀時裝形象設計，會對女團形象創意有什麼主見和幫助嗎 ？
我平時都好鍾意打扮，好鍾意留意人哋嘅穿搭同造型，我喺讀書嘅時候會更加多機會關注到而家流行嘅化妝和造型，所以喺團隊造型配搭上可以提供到唔少意見。另外我會根據我個人嘅審美幫助我哋每位成員配搭富有佢哋個人特點嘅服裝。見到出嚟嘅效果靚嘅話，我都好鍾意幫大家影相，咁樣就會好滿足了。
李濰靜（Marvia）
講一下自己的背景？
我喜歡舞台上的表演，學習芭蕾舞多年，曾獲得18區舞蹈大賽冠軍，是中學校內戲劇學會成員，獲得個人表演金獎，及後有參演電影，我也算是一個演員， 亦是Model 參加品牌宣傳，於前年參加工展小姐選美 。
加入Spiral的機緣和感想，在加入時有沒有特別有趣或難忘的事情發生？
我是公司星探於社交媒體發掘加入Spiral的， 難忘加入後不久因為飲食不檢點而失聲，之後非常注重練歌及拍MV前的飲食。工作時與Spiral 各成員日見夜見遇到很多有趣的事，他們喜歡說笑 ，原本笑點高的我也倍感開心。
拍第一輯MV的拍後感，用新科技拍出來的效果覺得怎樣？
拍攝第一輯MV後，我覺得很滿足 ，因為畫面豐富因為有許多夢幻場景。很期待觀眾觀看後的評論及意見。新科技拍出來的效果很真實和方便。超越時空的場景也可以被拍下。
Spiral是一隊和Virtual 世界結合的女團，大家如何看這個虛擬世界，和想像一下未來的音樂世界？
虛擬世界自然有虛擬偶像，他們好像動漫二次元世界女仔，我想他們在跟着我們跳舞時會很奇妙。音樂世界有這些虛擬世界的元素，就好像加入了電音風格於音樂之中。
每個人的新年新願望，希望在演藝界走得多遠？
希望新一年，在演藝界大紅大紫，能發揮所長，多元化發展。
你曾參與電影的演出，你如何看待歌影視三方的發展？在演藝生命中，你最享受的是什麼？
在歌唱方面，可以投射更多在戲劇課堂上學到的情感，唱歌技巧當然重要，因為我覺得自己算是初學者。影視方面，我希望自己能夠多些機會在這一方面的發展，因為我真的很喜歡參與影視界表演。我會不斷磨練自己，又會向其他家人多多學習。在演藝生命中，我最享受在幕前看到自己盡心盡力做好的表演，最重要是Fans的支持及鼓勵，別人對我的欣賞是我的動力。
何思澄（SzeChing）
講一下自己的背景？
Hello 我係思澄，今年19歲，由4歲開始學習芭蕾舞和Jazz，已考取澳洲聯邦舞蹈教室協會的證書資格，2年前成為韓國練習生並出演Girls Planet999，現在是跳舞老師也是Spiral其中一位新成員。
加入Spiral的機緣和感想，在加入時有沒有特別有趣或難忘的事情發生？
當時係韓國返黎個陣非常迷茫，個陣返緊學，亦都有Part Time教跳舞，當時帶領學生出席跳舞表演嘅時間機緣巧合下，認識到公司經理人Kitz，經過面試後成功加入Spiral。
拍第一輯MV的拍後感，用新科技拍出來的效果覺得怎樣？
覺得好神奇，以前一直都以為MV只可以係錄影廠，綠幕或者戶外實境進行拍攝，估唔到居然依家科技發達到只需要一個地方就可以好似係任何場景咁拍攝一樣
Spiral是一隊和Virtual 世界結合的女團，大家如何看這個虛擬世界，和想像一下未來的音樂世界？
我覺得將虛擬跟女團二合為一呢件事好新奇，知道依家係科技時代，所以好期待以後嘅Spiral會係點樣。
每個人的新年新願望，希望在演藝界走得多遠？
我希望能夠打破所有障礙，成功成為更優秀嘅自己，無話有幾遠，只可以話會無止境咁進步同行落去！
韓國練習生的經驗，帶來什麼啟發？如何有助於你在Sprial的發揮？
我覺得韓國練習生呢個經驗對我黎講非常之有用，因為我知道呢D經驗未必每個人都有經歷，係我獨特嘅籌碼，我會好好運用係韓國學習到嘅籌碼，全運用係Spiral，為Spiral加油同行花路！
曾祉婷（Meme）
講一下自己的背景?
Hello! 我係Spiral嘅成員Meme，今年19歲，我會形容自己係Spiral嘅粉紅甜美擔當，因為我好鍾意浪漫又夢幻嘅嘢，同埋好鍾意兔仔！喺我嘅人生入邊，我有9成嘅時間都係跳緊舞，由幼稚園2歲已經參加咗學校嘅跳舞班，一跳就跳到而家，初初鍾意芭蕾舞之後接觸Kpop、Jazz Funk、Hip Hop，當中考到Ballet 10級嘅成績。除咗跳舞之外，我仲我鍾意彈琴，考到7級嘅成績，音樂對我來講就係治愈心靈最好嘅藥，所以我好享受一切同音樂有關嘅事物～
加入Spiral的機緣和感想，在加入時有沒有特別有趣或難忘的事情發生？
Spiral出到咗之後我又怕又期待，之前有拍過廣告同電影不過都係做小角色，而家終於可以做主角。至於我係點樣搵到呢個機會，都要多謝自己去演唱會認錯我哋公司嘅同事做當日演唱會嘅工作人員，隨後就收到Casting通知，哈哈哈。追呢個夢追咗好耐，人一世物一世，Spiral一定會好努力！雖然我哋四個女仔原先唔識大家，但係冇諗過我哋一拍即合，大家好啱傾。最難忘嘅回憶一定係有一次我哋練舞咁啱撞正500年一遇嘅黑雨同10號風球，知道消息嗰陣仲喺跳舞Studio，跟住一齊淋雨行返公司，因為水浸冇車返屋企所以大家決定咗喺公司唱K同埋開餐，雖然淋雨之後大家都病晒，但係真係好難忘嘅經歷。
拍第一輯MV的拍後感，用新科技拍出來的效果覺得怎樣？
一開始我哋公司同我哋講MV要拍三日，我好驚訝冇諗過要拍咁耐，不過到咗場地之後發現原來我哋係用XR新科技來做拍攝背景，覺得好方便同埋神奇，拍出嚟畫面好靚，比實景更加夢幻，MV仲有一幕係我同兔仔一齊拍！公司都知道我好鍾意兔仔，所以特登安排一隻兔仔俾我，好開心。
Spiral是一隊和Virtual 世界結合的女團，大家如何看這個虛擬世界，和想像一下未來的音樂世界?
Spiral係走Cyber嘅風格，MV亦都加插咗好多高科技嘅元素，呢個亦都係我哋同其他女團嘅不同之處，我哋四個成員都各自有一個自己嘅Virtual Idol，即係元宇宙嘅自己。見到虛擬版嘅Meme突然覺得充滿着無限嘅Possibilities，可以見到自己原來有咁多面嘅可能，SPIRAL話唔定第時可以有個Virtual Idol Concert! 好期待呢！
每個人的新年新願望，希望在演藝界走得多遠？
Meme嘅新年願望係身體健康，咁先有更多力氣同Spiral作戰。希望Spiral嚟緊可以出多啲新歌，甚至拍綜藝節目，我自己就一直都好想試吓拍電影同演戲。
聽說你也玩樂器的，是什麼樂器呢，有沒有機會在Spiral中表演呢？讀書和事業難兼顧嗎？
我好鍾意彈鋼琴，幾年前考到7級，不過到而家都仲有自彈自唱或者彈流行曲，嘗試緊為Spiral寫歌，不過我發現咗真係好唔容易。諗諗吓第時加插一段鋼琴演出喺表演入面都會幾特別！至於讀書同事業兼顧方面，我會盡力兼顧兩邊，但係一定有要取捨嘅時候，點都好，我覺得自己開心最重要！
