餐廳室內外座位都有大量打卡位，結合17世紀巴洛克風格、配搭樹脂流體藝術品，時尚而不失優雅。室內裝修以黑、白及橙色為主調；室外好似比城市中嘅綠洲咁，有種繁榮鬧市中帶點寧靜嘅感覺。餐廳由擁有超過30年經驗嘅主廚Ryan主理，採用本地、日本時令海鮮，創作出一系列糅合傳統意大利菜及日式風味嘅Fusion菜式。

喺呢間隱藏喺鬧市既餐廳食飯，小酌一杯，感覺上人都變得優雅咗。餐廳嘅裝潢十分精美，燈光柔和，非常適合與親朋好友共進晚餐或約會用餐。而食物更加令人驚艷，環境同嘢食都相輔相成，菜式新穎有創意，所以真係值得一試。

從頭盤至甜品之精選：

Spicy Maguro and Avacado $88
中拖羅牛油果沙律

選用油脂感適中嘅中拖羅，加入少許泡菜，有微辛嘅味道，沙律菜選用火箭菜，同Creamy嘅牛油果起到和諧嘅效果，喺一道非常清爽嘅前菜。

Braised Australian Beef Cheek $328
燴澳洲牛面頰

牛面頰燴到好軟爛，入口即化，有少少粘稠口感而且完全唔會黐牙，感覺上有滿滿嘅骨膠原，用紅酒煮嘅醬汁同牛面頰肉絕配，非常濃郁惹味。牛面頰底下有塊糖心蘿蔔，非常清甜，配菜喺和牛薯餅，麵包粉瑣住內裡水分，外脆內軟，點埋牛面頰嘅汁，令成個菜式更加昇華。

Crisp Apple Tart with Ice Cream $68
自家製蘋果撻伴雪糕

The Pearl 嘅招牌甜品，蘋果撻選用青蘋果，切得極薄身，一塊一塊鋪成一個撻焗製而成，一切落去已經聽到好清脆嘅聲音，暖暖嘅蘋果撻配埋雪糕一齊食，有冰火二重奏嘅感覺，青蘋果嘅果酸配雪糕嘅Creamy同甜味，作為飯後甜品份量啱啱好！

三款特製Cocktail

The Pearl $128

以餐廳命名嘅招牌Cocktail，以蕁麻酒、佛手柑同柑橘做主調，加入香檳調製而成，香檳嘅Dry配上酸酸甜甜嘅果香，口感清新，甜度適中，作為餐前酒非常合適，亦能夠中和肉類既油膩感。

1632 $128
Man in Oriental Costume

用Gin為基酒，配搭玄米茶同日本蛋白，酒味較輕，玄米茶味非常香，面層嘅蛋白泡同一粒粒嘅玄米令口感層次更豐富。

1662 $148
The Storm on the Sea of Galilee

 以Laphroaig Smoky Whiskey為基酒，以最古老嘅意大利雞尾酒之一——內格羅尼配搭， 酒味同煙燻味較重，可能喺男士會比較鍾意嘅味道，面頭仲配咗一塊脆身嘅風乾豬面頰肉，同Cocktail一齊品嚐，味道驚喜地和諧。

The Pearl

尖沙咀加連威老道20-22號瑞生尖沙咀酒店4樓